Apartamente e para të pajustifikuara, çfarë po ndodh me gjyqtaren e Kushtetueses Altina Xhoxhaj?

Komisioni i Pavarur i Kualifikimit ka shtyrë vendimin për gjyqtaren e Gjykatës Kushtetuese, Altina Xhoxhaj. Shkak për shtyrjen e kësaj seance janë bërë dokumentet shtesë të sjella nga gjyqtarja Xhoxhaj për likuiditet.

Gjyqtarja e Kushtetuese ka paraqitur sot dokumente shtesë për të justifikuar paratë. Për këtë arsye, KPK ka kërkuar kohë për t’i shqyrtuar dokumentet, duke shtyrë vendimin për në datën 03 maj 2018.

Nga hetimet e kryera, KPK ka arritur në konkluzionin se Xhoxhaj ka bërë deklarime të pavërteta dhe nuk justifikon burimin e të ardhurave të saj për apartamente e truall në Tiranë dhe Durrës, si dhe nuk justifikon shumën prej 4.4 milionë lekë.

Në seancën dëgjimore të ditës së hënë, gjyqtarja Xhoxhaj iu hakërrye trupës relatore të KPK se nuk e njohin ligjin, duke kërkuar që të rikonfirmohet në detyrë. Megjithatë, Xhoxhaj pritet të jetë gjyqtarja e radhës që ‘digjet’ nga ligji i Vettingut për mosjustifikim pasurie.

Me goditjen e anëtares Altina Xhoxhajt nga veprimi i ligjit të Vetingut, Gjykata Kushtetuese mbetet me tre anëtarë, në pamundësi për t’u mbledhur dhe për të marrë vendime, duke çuar kështu në mbylljen e gjykatës më të rëndësishme në Shqipëri.